Бібліятэка Глуска запрашае ў тэатр
Лялечны тэатр — адзін з цікавых і адметных накірункаў работы Глускай цэнтральнай раённай бібліятэкі. Годам заснавання яго лічыцца далёкі 1995-ы. Лялечныя спектаклі разам з бібліятэкарамі тады рыхтавалі і паказвалі юныя чытачы — гэта працаваў такі гурток па інтарэсах. У розныя часы кіравалі ім і займаліся з дзецьмі Валянціна Вішнявер, Марына Багук, Іна Малашук. Справа гэта была вельмі папулярная і паспяховая: у 2009 годзе лялечны тэатр “Церамок” Глускай раённай бібліятэкі на абласным аглядзе-конкурсе пастановак лялечных тэатраў (што працуюць пры бібліятэках) заняў першае месца.
Цяпер лялечныя прадстаўленні ладзяць самі бібліятэкары: падбіраюць сцэнарыі, абавязкова дапрацоўваюць і адаптуюць іх для сябе, для канкрэтнай нагоды і патрэбнай тэматыкі, прадумваюць музычнае афармленне, выступаюць перад юнымі гледачамі.
Самі ж робяць патрэбныя дэкарацыі і нават лялек, расказвае Дзіна Кульбіцкая (на здымку), загадчыца аддзела абслугоўвання бібліятэкі і кіраўнік лялечнага тэатра. Што да дзяцей, то ім па-ранейшаму падабаюцца яго пастаноўкі.
“Днямі адбылася чарговая прэм’ера — народнай казкі “Ліса і лапаць”, — расказала Дзіна Кульбіцкая. — Першымі яе паглядзелі выхаванцы дзіцячага садка № 3, а потым да нас на спектакль прыходзілі малодшыя школьнікі, яны якраз былі на канікулах, і казка, і забаўляльная праграма ім спадабаліся”. А раз так, то будуць новыя лялечныя пастаноўкі, цікавыя і пазнавальныя.
Т. ЛУГАВАЯ
Фота аўтара
