Грошай на дах не хапіла

За май і першую палову чэрвеня ў прадстаўніцтва “Белдзяржстраха” па Глускім раёне з заявамі аб кампенсацыі ўрону звярнуліся 36 страхавальнікаў жылля і маёмасці. Сямі гаспадарам, што мелі толькі дагаворы абавязковага страхавання, прычынены стыхіяй (навальніцай і ветрам) урон кампенсаваны толькі напалову. Астатнія 29 пацярпелых атрымалі поўныя выплаты па добраахвотных страхоўках жылля і маёмасці. Магла б на гэта разлічваць і адна жыхарка вёскі Слабодка, у якой на пачатку месяца ветрам з хаты сарвала дах. Аднак ліратальна ў мінулым годзе яна перарвала добраахвотную страхоўку жылля і заключыла толькі дагавор абавязковага страхавання.
— Паступіўшы так, наша кліентка пры наступленні страхавога выпадку страціла немалую суму грошай, — гаворыць дырэктар прадстаўніцтва “Белдзяржстрах” Генадзь Ліпскі, — па факту здарэння мы кампенсавалі толькі палову прычыненага ўрону, а будзь у яе, як і раней, дагавор добраахвотнага страхавання, мы б поўнасцю аплацілі ўсе рамонтныя работы, якія выконваў “Жылкамгас”. А гэта значна больш, чым атрымала жанчына.
Як паведамілі нам у мясцовым прадстаўніцтве “Белдзяржстраха”, былі яшчэ 10 заяў ад пацярпелых, у каго ад разгулу стыхіі пашкоджаны надворныя пабудовы, аднак гэтыя гаспадары мелі толькі дагаворы абавязковага страхавання жылля, па якіх кампенсацыя ўрону за гаспадарчыя пабудовы не прадугледжана. Таму ў названых выпадках выплаты не праводзіліся.
Т. ЛУГАВАЯ