Кароткачасовыя дажджы і навальніцы чакаюцца ў Беларусі на выхадных
Кароткачасовыя дажджы і навальніцы чакаюцца ў Беларусі на выхадных, паведаміла галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Святлана Рыбакова.
“У гэтыя выхадныя ў Беларусі чакаецца няўстойлівае надвор’е з тэмпературным фонам, блізкім да кліматычнай нормы. Уплыў на надвор’е пераважна будуць аказваць атмасферныя франты, што змяшчаюцца з паўднёва-заходніх раёнаў Еўропы. Ціск будзе падаць, стане больш аблокаў, тэмпературны фон паступова панізіцца”, – адзначыла Святлана Рыбакова.
У пятніцу, 13 мая, ноччу месцамі пройдуць кароткачасовыя дажджы. Днём дажджы чакаюцца пераважна ў паўднёва-заходняй частцы краіны, дзе праявіцца ўплыў франтальнага раздзелу. У асобных раёнах прагрымяць навальніцы. Вецер чакаецца паўднёва-ўсходні ўмераны, пры навальніцах парывісты. Тэмпература паветра ноччу складзе 6-12 градусаў цяпла, у паўночна-ўсходніх раёнах Віцебскай вобласці пры ясным небе тэмпература паветра панізіцца да 2-5 градусаў вышэй за нуль, у дзённы час прагназуецца 16-22 градусы.
У гэтыя выхадныя дні Беларусь будзе знаходзіцца пад уплывам маларухомых атмасферных франтоў. У суботу, 14 мая, чакаецца воблачнае з праясненнямі надвор’е, на большай частцы тэрыторыі краіны пройдуць кароткачасовыя дажджы рознай інтэнсіўнасці, месцамі прагрымяць навальніцы. Пры навальніцах магчымы парывісты вецер. Тэмпература паветра ноччу складзе 6-13 градусаў вышэй за нуль, днём будзе 13-20 градусаў цяпла, месцамі паветра прагрэецца да плюс 23.
У нядзелю, 15 мая, на большай частцы тэрыторыі краіны чакаюцца кароткачасовыя дажджы, у асобных раёнах – навальніцы. Ноччу і раніцай месцамі магчымы туман. Тэмпература паветра ноччу складзе 6-13 градусаў вышэй за нуль, днём прагназуецца 12-19 градусаў цяпла.
У пачатку наступнага тыдня надвор’е ў краіне абумовяць атмасферныя франты, за якімі на тэрыторыю нашай краіны будуць паступаць халаднаватыя няўстойлівыя паветраныя масы з Балтыйскага мора. У панядзелак ноччу месцамі, а днём на большай частцы тэрыторыі краіны пройдуць кароткачасовыя дажджы, у асобных раёнах – навальніцы. Тэмпература паветра ноччу складзе 4-11 градусаў вышэй за нуль, днём чакаецца 12-19 градусаў цяпла.
17-18 мая месцамі прагназуюцца кароткачасовыя дажджы, днём магчымы навальніцы. Тэмпература паветра ноччу складзе 2-9 градусаў вышэй за нуль, днём будзе 11-18 градусаў цяпла.