На пачатку кастрычніка актывісты гімназіі і сярэдняй школы № 1 Глуска сабраліся каля Свята-Богаяўленскага храма, каб дапамагчы ў добраўпарадкаванні царкоўнага двара. Піянеры і школьнікі прыходзяць сюды не першы раз з таго часу, як Беларускі рэспубліканскі саюз моладзі і Беларуская рэспубліканская піянерская арганізацыя вырашылі штогод праводзіць дабрачынную акцыю “Аднаўляем святыні Беларусі” па рэканструкцыі і добраўпарадкаванні праваслаўных храмаў краіны. Ідэю падтрымала і Беларуская праваслаўная царква, спрыяючы са свайго боку знаёмству падлеткаў з духоўнай і культурнай спадчынай і выхаванню маральных каштоўнасцей.

На гэты раз маладыя дужыя хлопцы заняліся на царкоўным двары землянымі работамі. Адбылося гэта акурат у дзень памяці прападобнага Сергія Раданежскага, і з гэтай нагоды настаяцель Свята-Богаяўленскага храма айцец Міхаіл падарыў на развітанне кожнаму з валанцёраў абразок з выявай святога.                                     

Аксана ВАСІЛЕЎСКАЯ

Фота Сяргея РУДЗІНСКАГА