Уручыла грамату начальнік галоўнага ўпраўлення па адукацыі Магілёўскага аблвыканкама Людміла Здорыкава на ўрачыстым сходзе да Дня настаўніка, які сабраў на мінулым тыдні ў абласным цэнтры педагогаў з усяго рэгіёна.

Такой высокай прафесійнай узнагародай адзначана шматгадовая плённая праца Наталлі Міхайлаўны ў сістэме адукацыі і яе значны ўклад у навучанне і выхаванне падрастаючага пакалення.

У 1985 годзе Наталля Шылава прыйшла працаваць піянерважатай у Завалочыцкую школу, тую, дзе сама вучылася, дзе амаль сорак год вучыў дзяцей яе бацька (і 35 з іх быў дырэктарам), дзе школьным бібліятэкарам была яе маці. А ў 2000-м годзе ўзначаліла гэту школу.

Сорак год педагагічнага стажу і 25 дырэктарскага — гэта, безумоўна, вопыт і вялікае дасягненне. Тым болей што ў выпадку Наталлі Міхайлаўны трэба гаварыць ужо і пра дынастыю: з педагагічнай галіной звязалі свае лёсы малодшая сястра, дачка і пляменніца. Так што ўзнагарода гэта, Ганаровая грамата  за подпісам міністра адукацыі, цалкам заслужаная, да таго ж прыемнасць для ўсёй сям’і і, безумоўна, для ўсяго калектыву Завалочыцкай школы. Таму што толькі пры падтрымцы ўсёй каманды можна атрымаць добры вынік, упэўнена Наталля Шылава.

Дарэчы, яшчэ адным падарункам да Дня настаўніка для Наталлі Міхайлаўны стала мерапрыемства ў Нацыянальным акадэмічным Вялікім тэатры оперы і балета. Туды запрасілі лепшых настаўнікаў з усёй рэспублікі, прывітальны адрас ад кіраўніка краіны для іх зачытаў першы намеснік Главы Адміністрацыі Прэзідэнта Уладзімір Пярцоў, з віншаваннямі выступіў міністр адукацыі Андрэй Іванец. Завяршылася сустрэча спектаклем “Патэтычны дзённік памяці”.

“Кранальнае, незабыўнае дзеянне, якое ўзрушыла і заставіла перажыць цэлую гаму эмоцый”, — падзялілася ўражаннямі Наталля Шылава.

А. ВАСІЛЕЎСКАЯ

Фота дадзена Н. Шылавай