На Глушчыне пасеялі больш за палову ранніх яравых
У Глускім раёне набірае тэмпы веснавая сяўба.
Так, ранніх зерневых і зернебабовых пасеялі больш за палову ад патрэбнага: 1574 гектары. Самы высокі тэмп выкананых работ — у “Турыно-агра” (85,1 %) і “Глускай Зары” (73,2 %) . Аўса гаспадаркі раёна пасеялі 903 гектары (74,6 %), амаль напалову пасеяны зернебабовыя культуры: 590 гектараў з 1310 планавых. У “Турыно-агра”, дзе пасеялі ўсе 60 гектараў пшаніцы, а таксама авёс і зернебабовыя, пачынаюць сеяць ячмень.
Падсеяна 730 гектараў шматгадовых траў на пашы, гэта амаль палова ад таго, што патрэбна.
Вясной узаралі 3168 гектараў глебы, гэта 57 % ад патрэбнага, апераджальнымі тэмпамі гэтую работу вядуць у эксбазе “Глуск”: тут узарана 1127 гектараў з 1230 патрэбных, або 92 %.
Пад сяўбу ранніх яравых зерневых у раёне падрыхтавана 2690 гектараў глебы (пры плане 3130 га), а “Турыно-агра”, “Глуская Зара” і “Глускае РАПТЗ” з заданнем ужо справіліся.
Ідуць работы і на палях з азімымі культурамі: з 400 гектараў азімага рапсу на зерне азотнымі ўдабрэннямі падкормлена 300 гектараў, гэта ўжо другая падкормка азотам. Таксама “Глускае РАПТЗ” падкарміла азотам 25 гектараў азімай свірэпіцы на зерне, а “Глуская Зара” — 141 гектар азімых зерневых на корм.
Не спыняецца работа па вывазцы і ўнясенні арганічных угнаенняў.
З вывезеных на палі 164 тысяч тон арганікі ў глебу пад яравую сяўбу ўнесена амаль 94 тысячы тон. Тры гаспадаркі завяршылі вывазку ўгнаення на палі, гэта “Турыно-агра”, “Глуская Зара” і РАПТЗ, у апошнім сельгаспрадпрыемстве ўсе 45 тысяч тон вывезенай арганікі задзеланы ў глебу. Калійныя ўдабрэнні пад яравую сяўбу ўнесены на 9 з паловай тысячах га.
Інфармацыя падрыхтавана па даных упраўлення па сельскай гаспадарцы і харчаванні райвыканкама на раніцу 31 сакавіка
Т. ЛУКАШЭВІЧ
Фота Г. АЎТУХОВАЙ
