Задача нумар адзін для аграрыяў
Пытанні падрыхтоўкі да палявых работ, стварэння трывалай кармавой базы і ўборкі ўраджаю ў 2025 годзе разглядаліся ўчора на пасяджэнні Магілёўскага абласнога выканаўчага камітэта. Задача нумар адзін для ўсіх аграрыяў вобласці — зладжана і ў агратэхнічныя тэрміны правесці пасяўную кампанію. Асноўныя патрабаванні — строгае захаванне працоўнай дысцыпліны на кожным рабочым месцы і поўнае выкананне тэхналогіі. Асаблівая ўвага — здароўю людзей і стварэнню неабходных умоў для іх бяспечнай працы. Такія патрабаванні прагучалі падчас пасяджэння аблвыканкама.
У Глускім раёне зараз досыць актыўна вядуцца такія віды палявых работ, як унясенне арганічных угнаенняў і веснавое ўзворванне глебы. Так, штодня ў глебу ў сярэднім па раёне ўносіцца каля 4 тысяч тон угнаення, і зараз агульная лічба ўнесенай арганікі складае 52 тысячы тон. Узарана каля 1300 гектараў глебы, што адпавядае 23 працэнтам да патрэбнага, каля паловы ўзаранай плошчы прыпадае на эксперыментальную базу “Глуск” — больш за 550 гектараў. Добрымі тэмпамі вялося ўнясенне калійных удабрэнняў пад яравую сяўбу: пры плане амаль у 11 тысяч гектараў калій унесены на 8500 гектарах, гэта 78 працэнтаў да неабходнага. Да нечаканага сакавіцкага снегу справіліся аграрыі раёна з падкормкай азімага рапсу на зерне азотнымі ўдабрэннямі: падкормлена 410 гектараў. А вось работам па падкормцы азімых зерневых на зерне нядаўнія зімовыя ападкі перашкодзілі: азотам падкормлена каля 2300 гектараў пры заданні 6105. Пакуль дазвалялі ўмовы надвор’я, у раёне вялі падсеў шматгадовых траў на пашы, работы выкананы на чвэрць (каля 380 гектараў). Хутка пачнецца і сяўба ранніх яравых зерневых і зернебабовых культур, у плане значыцца лічба 3130 гектараў.
Інфармацыя падрыхтавана па даных упраўлення па сельскай гаспадарцы і харчаванні райвыканкама на 17 сакавіка
Т. ЛУГАВАЯ
