У чацвёртую пятніцу месяца расказваем пра беларускія прысмакі. Раней на сталах беларусаў частым госцем была верашчака — святочны варыянт мачанкі. Ёсць розныя рэцэпты, прапануем адзін з іх.

Вам спатрэбіцца каля кілаграма свіных рабрынак, 400 грамаў дамашняй каўбасы, несалодкі хлебны квас, 300 грамаў цыбулі, 3—4 лаўровыя лісты, 50 грамаў жытнёвай мукі, 0,5 чайнай лыжкі перцу гарошкам, перац молаты, алей, соль.

Рабрынкі разабраць, паперчыць-пасаліць, абсмажыць на алеі на папярэдне разагрэтай патэльні, пасля падсмажыць каўбаску, нарэзаную кавалачкамі. Цыбулю парэзаць паўкольцамі або кубікамі і абсмажыць у тым жа алеі, што і мяса. Калі цыбуля пачне румяніцца, дадаць да яе муку і гатаваць да залацістага колеру.

У форму для запякання пакласці каўбасу і рабрынкі, перац гарошкам, лаўровыя лісцікі, цыбулю. Усё заліць даверху квасам і запякаць у духоўцы 40—45 хвілін пры 190—200 градусах.

Падавайце з блінамі ці картопляю. Смачна есці!

А. ВАСІЛЕЎСКАЯ