У журналісцкай працы бываюць выпадкі, калі з надрукаваным артыкулам гісторыя героя (ці гераіні) публікацыі не заканчваецца. Так здарылася і зараз. Пасля таго як у газеце быў надрукаваны матэрыял “У кожнага свой лёс”  (№ 22 ад 22 сакавіка), гераіняю якога стала жыхарка вёскі Макавічы Валянціна Андрэеўна Пятрэня (у дзявоцтве Парахаўнік), у рэдакцыю звярнуўся жыхар Глуска Аляксандр Барысавіч Лабейка. Ён пазнаў Валянціну Андрэеўну па старым здымку 1960-х гадоў. Як высветлілася, у 1955-м Аляксандр Барысавіч і мая гераіня разам удзельнічалі ў абласной камсамольскай канферэнцыі ў Мінску (Глускі раён у той час уваходзіў у склад Мінскай вобласці).

У пачатку снежня 1955 года другі сакратар райкама камсамола Аляксандр Лабейка сеў у Глуску на матацыкл і паехаў у Макавічы забраць і даставіць у Глуск камсамольскую актывістку, ударніцу працы Валянціну Парахаўнік. Разам з дэлегацыяй моладзі ад нашага раёна яны адпраўляліся ў сталіцу. Дабіраліся да Мінска нашы дэлегаты на рэйсавым аўтобусе. “Мы прыехалі напярэдадні мерапрыемства, — распавёў Аляксандр Барысавіч Лабейка. — Пераначавалі. Потым на працягу дня ўдзельнічалі ў канферэнцыі: слухалі даклады, абмяр-коўвалі вынікі работы камсамольцаў вобласці за год, дзяліліся сваімі думкамі, планамі і гэтак далей. Вечарам нас усіх запрасілі ў оперны тэатр, дзе для моладзі зладзілі “Бал студэнтаў”. Там былі песні, танцы, розныя конкурсы… Карацей кажучы, мы вельмі цікава, весела правялі вечар. Да таго ж у нефармальнай абстаноўцы пазнаёміліся, пагаварылі з камсамольцамі са сталіцы і іншых раёнаў”.

У Аляксандра Барысавіча захаваўся і агульны фотаздымак з таго памятнага мерапрыемства, які ён прынёс у рэдакцыю, а цяпер яго бачыце і вы.

Вольга ЯНУШЭЎСКАЯ

Фота з архіва Аляксандра Барысавіча Лабейкі